أحاديث ضعيفة مشهورة وبدائلها الصحيحة ( 5 )

النهاردة بإذن الله هنتكلم عن حديث كلنا عارفينه من ايام الحضانة ويمكن اول حديث حفظناه

حديث بيتكلم عن النظافة
كده الكل عرفه أكيد

حديثنا النهاردة


" النظافة من الإيمان "
ليس بحديث

و عندنا حديث ضعيف بنفس المعنى تقريبا

" تخللوا فإنه نظافة ، و النظافة تدعو إلى الإيمان ، و الإيمان مع صاحبه في الجنة "
الراوي: عبدالله بن مسعود المحدث: الألباني - المصدر: ضعيف الجامع - الصفحة أو الرقم: 2414
خلاصة حكم المحدث: موضوع



لكن ده لاينفي إن الإسلام دين النظافة
لكن إيه النظافة اللي بيدعو ليها الإسلام ؟
سؤال سهل وبسيط

نظرة الإسلام للنظافة نظرة شاملة لكل شيء

مش بس كده
الإسلام جعل النظافة والطهارة ركناً ركيناً وأصلاً من الشريعة والدين

يقول صلى الله عليه وسلم : " الطهور شطر الإيمان ..............."
الراوي: أبو مالك الأشعري المحدث: مسلم - المصدر: صحيح مسلم - الصفحة أو الرقم: 223
خلاصة حكم المحدث: صحيح


لكن للأسف بعض الناس تلاقيها ماشيه وملابسها مش نظيفة
وتلاقي رجاله ماشية شعرها مش متسرح وحالتها حاله
وتعتبر ده من الزهد في الدنيا
والشيطان يقعد يوسوس بقى المهم نظافة القلب نظفي قلبك الأول

لكن حبيبك النبي صلى الله عليه وسلم وهو أزهد الزاهدين بيقولك
خليكي نظيفة

- أتانا رسول الله - صلى الله عليه وسلم - زائرا ، فرأى رجلا شعثا قد تفرق شعره ، فقال :" أما كان يجد هذا ما يسكن به رأسه " ؟ ! ، ورأى رجلا عليه ثياب وسخة ، فقال :" أما كان يجد هذا ما يغسل به ثوبه " ؟ ! .
الراوي: جابر بن عبدالله المحدث: الألباني - المصدر: تخريج مشكاة المصابيح - الصفحة أو الرقم: 4277
خلاصة حكم المحدث: إسناده صحيح

يعني خليكي حريصة إنك تلبسي نظيف ويكون شكلك حلو ومهندم كده وزي القمر علشان ده من دينك

مش شرط تلبسي غالي لأه على قد إمكانياتك بس خليكي نظيفة



وإوعي تلبسي حاجة علشان تتكبري بيها على الناس
يقول صلى الله عليه وسلم : " لا يدخل الجنة من كان في قلبه مثقال ذرة من كبر . قال رجل : إن الرجل يحب أن يكون ثوبه حسنا ونعله حسنة . قال : إن الله جميل يحب الجمال . الكبر بطر الحق وغمط الناس "
الراوي: عبدالله بن مسعود المحدث: مسلم - المصدر: صحيح مسلم - الصفحة أو الرقم: 91
خلاصة حكم المحدث: صحيح


طيب هو كده كفاية يكون لبسك نظيف وخلاص ؟
لأه طبعا لازم النظافة الشخصية كمان
يقول صلى الله عليه وسلم : " عشر من الفطرة : قص الشارب ، وإعفاء اللحية ، والسواك ، واستنشاق الماء ، وقص الأظفار ، وغسل البراجم ، ونتف الإبط ، وحلق العانة ، وانتقاص الماء "
. قال زكرياء : قال مصعب : ونسيت العاشرة . إلا أن تكون المضمضة . زاد قتيبة : قال وكيع : انتقاص الماء يعني الاستنجاء .
الراوي: عائشة المحدث: مسلم - المصدر: صحيح مسلم - الصفحة أو الرقم: 261
خلاصة حكم المحدث: صحيح

والبراجم دي نقدر نقول منعطفات الجسم، بعض العلماء نص على العُقد، يعني عُقد الأصابع، الأنامل، ويدخل فيها منعطفات البدن مثل ما تحت الركبة منعطف، المنعطفات دي اللي يمكن أن يتركز فيها بعض الوسخ.

كده وبس ؟



لأه لسه كمان
الإسلام خلى بجانب الأمور اللي بتوجب الغسل عندنا حاجات كتيييييييييييييييييرة يستحب ليها الغسل

خدي عندك يا ستي
في العيدين ، ويوم الجمعة ،والغسل لصلاة الكسوف ،والاستسقاء ، وللوقوف بعرفة ، والغسل بالمشعر الحرام ولرمي الجمار في أيام التشريق ، والإحرام ، وليلة القدر، وغيرها كتير

طيب كده كفاية ؟



لأه برضه لأن دي ممكن تكون مش كل يوم
لكن احنا عندنا الوضوء للصلاة
يقول صلى الله عليه وسلم : " أرأيتم لو أن نهرا بباب أحدكم ، يغتسل فيه كل يوم خمسا ، ما تقول : ذلك يبقي من درنه . قالوا : لا يبقي من درنه شيئا ، قال : فذلك مثل الصلوات الخمس ، يمحو الله بها الخطايا ".
الراوي: أبو هريرة المحدث: البخاري - المصدر: صحيح البخاري - الصفحة أو الرقم: 528
خلاصة حكم المحدث: [صحيح]

طيب كده كفاية ؟



لأه برضه

انتي كده بقيتي نظيفة لكن لسه نظافة المكان
تعرفي إنك تشيلي الذى من طريق الناس ده صدقة ؟

شوفي الحديث ده يا ستي
يقول صلى الله عليه وسلم :
"الإيمان بضع وسبعون أو بضع وستون شعبة . فأفضلها قول لا إله إلا الله . وأدناها إماطة الأذى عن الطريق . والحياء شعبة من الإيمان "
الراوي: أبو هريرة المحدث: مسلم - المصدر: صحيح مسلم - الصفحة أو الرقم: 35
خلاصة حكم المحدث: صحيح

يعني مش كفاية انك تكوني نظيفة وبيتك نظيف وتقولي كفاية كده كله تمام

لأه يا جميل لسه دورك مخلصش
مش تكنسي بيتك وترمي في الشارع كده معملتيش حاجة
ده المفروض تشيلي الأذى من طريق الناس مش تحطيه في طريقهم

ومش تنظفي بيتك وحواليكي وتروحي تصلي في المساجد بيوت الله وتمشي وهيه مليانه مناديل واكل واخده لأولادك علشان تعرفي تصلي ولا تحطي النواة تحت السجادة زي ما ناس بتعمل
لأه مينفعش

شوفي الفرق بين اللي بتعمل كده وبين حال اللي كانت تقم أي تنظف المسجد
ففي الحديث
أن امرأة سوداء كانت تقم المسجد ( أو شابا ) ففقدها رسول الله صلى الله عليه وسلم . فسأل عنها ( أو عنه ) فقالوا : مات . قال أفلا كنتم آذنتمونى . قال : فكأنهم صغروا أمرها ( أوأمره ) . فقال : دلوني على قبرها فدلوه . فصلى عليها . ثم قال إن هذه القبور مملوءة ظلمة على أهلها . وإن الله عز وجل ينورها لهم بصلاتي عليهم .
الراوي: أبو هريرة المحدث: مسلم - المصدر: صحيح مسلم - الصفحة أو الرقم: 956
خلاصة حكم المحدث: صحيح



طيب كده تمام وزي الفل بقيت نظيفة وبيتي نظيف والشارع نظيف والمسجد نظيف وكل حاجة بتبرق

كده كفاية بقى ؟

لسه يا جميل أهم حاجة
لسه طهارة قلبك ولسانك


صعبة ؟
لأه صدقيني مش صعبة
مش صعب إنك تخلي قلبك نقي صافي متسامح خالي من الحقد والحسد والضغينه مفيهوش مكر ولا خداع ولا سوء نوايا

وتخلي لسانك حلو مش ممكن يسب أو يشتم أو يجرح
مينطقش غير بكل بخير

لو أخلصتي النية لله وفكرتي فيما عند الله هتلاقيها مش صعبة
لكن لازم يكون عندك عزيمة وإراده للتغيير