أحاديث ضعيفة مشهورة وبدائلها الصحيحة ( 2 )

الحلقة الثانية :
النهاردة هنتكلم عن حديث بنسمعه كتير ، أحيانا من ناس تقوليلهم قوموا صلوا فيقولوا الحديث اللي هنتكلم عنه ،
وأحيانا بنقوله لما بنتكلم عن أهمية العمل .

أكيد كده عرفتوه كلكم

حديثنا النهاردة
" العمل عبادة "
وهو حديث لا أصل له




زعلتي وكان نفسك العمل يبقى عباده فعلا ، مش الصوم والصلاة والزكاة والحج بس ؟

وأنا مقدرش أشوفك زعلانة

وعلشان كده هأقولك على حاجة تخلي كل لحظة في يومك كله عباده حتى وانتي بتاكلي أو بتشربي أو حتى نايمة مش في الشغل بس

أقولكم على السر ولا عارفينه؟

السر في النية





بس بقى منروحش من أقصى الغرب لأقصى الشرق
ونجيب حديث تاني ضعيف بيقول:

" نية المؤمن خير من عمله ، وعمل المنافق خير من نيته ، وكل يعمل على نيته ، فإذا عمل المؤمن عملا ، ثار في قلبه نور "
الراوي: سهل بن سعد الساعدي المحدث: الألباني - المصدر: السلسلة الضعيفة - الصفحة أو الرقم: 2216
خلاصة حكم المحدث: ضعيف

لكن نخلينا في النص ونعمل بالحديث الصحيح اللي بيقول
"إنما الأعمال بالنيات ، وإنما لكل امرئ ما نوى ، فمن كانت هجرته إلى دنيا يصيبها ، أو إلى امرأة ينكحها ، فهجرته إلى ما هاجر إليه "
الراوي: عمر بن الخطاب المحدث: البخاري - المصدر: صحيح البخاري - الصفحة أو الرقم: 1
خلاصة حكم المحدث: [صحيح]




شوفتي ؟
السر في النية
لأن النية هيه اللي هتحول عاداتك كلها لعبادات

فالعمل المباح زي التجارة والصناعة.. وغيرها ممكن يكون عبادة لو نوى الإنسان به نية حسنة ، زي كف نفسه عن سؤال الناس والحاجة إليهم ، أو النفقة على أهله ، أوالتصدق على المحتاجين، وصلة الرحم، ونفع المسلمين بهذا العمل..
أي نيه صالحة يختارها يثاب عليه بفضل الله

ومش تبسمك فى وجه أخيك صدقة ؟ يبقى تبسمك عبادة
حسن التبعل للزوج عبادة من أكل و تنظيف وغيره
كوباية الشاي اللي هتعمليها لزوجك عبادة
حتى لو اجتمعتي مع جارتك بنية انها عبادة لأن النبى أوصانا بالجار يبقى كوباية الشاي لها عبادة
تربية لولادك عباده
تنظيفك لبيتك عباده
نومك عباده
كلامك عباده

حياتك كلها عباده لو اخلصتي النية لله


اوعي تخلي عمرك بعد كده يعدي من غير فايده
ودايما جددي نيتك وخلي لكل عمل بتعمليه نية




أشوفكم بكره بإذن الله