العمر بيعدي يا جدعان

من طرف أم مريم الأحد يوليو 25, 2010 6:23 pm

زمان وانا صغير ( مش من زمان قوي يعني )

كنت اضايق قوي لما اكون بتفرج على مسلسل وألاقي مثلا طفل صغير في المسلسل وانا بتفرج فجأة بقى راجل ملوي هدومه وشنباته يقف عليها الصقر

او واحدة عرفت انها حامل في اول الحلقة ولاقيها ولدت اخر الحلقة

وكأن مقياس الزمن بتاعهم مختلف عن بتاعنا وكنت افضل اقول اشمعنى انا لسه صغيرة

اشمعنى الدراسة ما بتخلصش بسرعة وبيطلع عيني على بال ما الاجازة تيجي

وكنت بغير بئى من ابطال المسلسل

عيلة بئى وعلى قد عقلي

دلوقتي بئى حاسة اني اتحولت الى بطلة من ابطال مسلسل تلفزيوني او فيلم سنمائي والاحداث بتتطور من حواليا بسرعة وانا مش ملاحقة خالص حتى اخد بالي من اللي بيحصل.

بجد ماعدش في بركة في الوقت اطلاقا وحاسة ان الوقت بئى عامل زي حصان السبق بيجري بيجري ومابيوقفش

او زي القطار السريع اللي من غير فرامل

لما ببص لبنوتي حبيبتي مريومة ما بصدقش نفسي واقول معقوله انا اتجوزت وخلفت وبقيت ام ؟

امتى حصل الكلام ده ؟

ده نا حاسة ان امبارح بس كنت قاعدة على الكمبيوتر في غرفتي ومعايا صديقتي الحبيبة بنجيب نتيجة التخرج

اتجوزت وهي كمان اتجوزت وبقينا امهات وغرفتي الحبيبة مابقتش غرفتي وعدى من عمري بعد اللحظة دي اكتر من سنتين

كلها شهر وأتم 25 سنة .

امتى وازاي وفين وعلمت ايه

مش عارفة

بس كل اللي عارفاه اني حاسة ان العمر بيتسرق مني وبيعدي

وخايفة قوي من الحظة اللي ينتهي فيها

ربنا يسترها معانا ويهدينا

المشكلة العويصة ان الواحد مش عارف عمره هينتهي امتى

صحيح انا خلاص هتم ال 25 سنة بس يا ترى اصلا هلحق اتمهم

يا ترى ممكن اصحى الاقي نفسي عندي مثلا 50 سنة واقول يااااه ده العمر عدى

ولا مش مكتوب لي ان بكرة يطلع عليا؟

كده كده العمر هيجري وينتهي

بس يا ترى عملنا فيه ايه ؟

يا ترى لما تيجي اللحظة الاخيرة في عمرنا هيكون حالنا ايه؟

يا ترى الواحد مننا هيقول " يا حسرتى على مافرطت في جنب الله "

ولا هيفرح بلقاء ربه

ربنا يسترها يارب

**************
سؤال على الهامش: يا ترى حاسس ان عمرك عدى على الفاضي ولا اغتنمته على قد مقدرتك فيما يرضي الله؟[center]

من طرف **MaNo4a** الأحد يوليو 25, 2010 6:52 pm

جزاكي الله خيراً

موضوع جميل جداً

من طرف **أواب** الإثنين يوليو 26, 2010 5:37 am

أعقل الناس من ترك الدنيا قبل ان تتركه وانار قبره قبل ان يسكنه وارضي ربه قبل ان يلقاة
وصلي الجماعةقبل ان تصلي عليةوحاسب نفسةقبل ان تحاسبة
فاليوم عمل بلاحساب وغداحساب بلاعمل
اللهم انا نسالك العفو والعافيه في الدنيا والاخره
جزاكم الله خيراَ على المشاركة

من طرف ???? الثلاثاء سبتمبر 20, 2011 5:36 am

موضوع جميل

الأنسان عادة بيشعر نفسك شعورك ده يعني أنا طول حياتي حتي من ساعة ما كان عندي 7 سنين بقول ياه 7 سنين أزاي عشتهم أمتى

لكن فعلاً زي ما تفضلتي لو حسبنا عمرنا بعملنا الصالح هيكون أفضل وأوقع حساب

ربنا يكتب لنا حسن الخاتمة جميعاً