أحاديث ضعيفة مشهورة وبدائلها الصحيحة ( 6 )

هنتكلم النهاردة بإذن الله عن حاجة محتاجينها كلنا دايما ودلوقتي أكتر كمان ومش هتنهض أمتنا من غيرها أبدا

حديثنا النهاردة عن طلب العلم وبنردده كتير

" اطلبوا العلم و لو بالصين ، فإن طلب العلم فريضة على كل مسلم ، إن الملائكة تضع أجنحتها لطالب العلم رضا بما يطلبه ".
الراوي: أنس بن مالك المحدث: الألباني - المصدر: ضعيف الجامع - الصفحة أو الرقم: 907
خلاصة حكم المحدث: موضوع

وكمان

" اطلبوا العلم من المهد إلى اللحد "
لا يصح سندا وقد أورده العجلوني في كتابه كشف الخفاء ومزيل الإلباس عما اشتهر من الأحاديث على ألسنة الناس



لكن طبعا معناه صحيح

حاسه إن في ناس كتيره دلوقتي عامله كده وبتقول يييييييييييييييييييه
ماكنا كويسين ايه اللي هيخلينا في العلم والكتب والمذاكرة

بالراحة بس عليه

لو تعرفي قد إيه فضل طلب العلم مكنتيش سيبتي الكتاب من إيدك خاااااااااااااااالص

تعالي ناخد أمثله بسيطة كده

يقول صلى الله عليه وسلم : " صاحب العلم يستغفر له كل شيء ، حتى الحوت في البحر "
الراوي: أنس بن مالك و أبو أمامة المحدث: الألباني - المصدر: صحيح الجامع - الصفحة أو الرقم: 3753
خلاصة حكم المحدث: صحيح

وكمان

" من سلك طريقا يطلب فيه علما ، سلك الله به طريقا من طرق الجنة ، وإن الملائكة لتضع أجنحتها لطالب العلم رضا بما يصنع ، وإن العالم ليستغفر له من في السموات ، ومن في الأرض ، والحيتان في جوف الماء ، وإن فضل العالم على العابد كفضل القمر ليلة البدر على سائر الكواكب ، وإن العلماء ورثة الأنبياء ، وإن الأنبياء ، لم يورثوا دينارا ، ولا درهما ، إنما ورثوا العلم ، فمن أخذه أخذ بحظ وافر "
الراوي: أبو الدرداء المحدث: الألباني - المصدر: صحيح الجامع - الصفحة أو الرقم: 6297
خلاصة حكم المحدث: صحيح

وده كمان

" من سلك طريقا يلتمس فيه علما سهل الله له طريقا إلى الجنة "
الراوي: أبو هريرة المحدث: الألباني - المصدر: صحيح الترمذي - الصفحة أو الرقم: 2646
خلاصة حكم المحدث: صحيح

نقول كمان ولا كفاية كده
كفاية كده




شوفتي بتضيعي عليكي أجر كبير إزاي ؟

لازم تتعلمي أمور دينك
في حاجات أساسية لازم كل مسلم ومسلمة يعرفوها مينفعش حد فينا ميعرفهاش

لازم نعرف كلنا أصول الإيمان وأركانه اللي لا يتم الإيمان إلا بها
ونعرف الحلال القطعي والحرام القطعي وده العلماء بيسموه ( المعلوم من الدين بالضرورة ) كوجوب الصلاة والزكاة ونحوها، ومعرفة حرمة الشرك ، وعقوق الوالدين ، والزنا ، وأكل الربا ونحوها.
كمان نعرف الحاجات اللي بيتوقف عليها صحة العبادة واجبة علينا زي أحكام إقامة الصلاة بمعرفة أركانها وشروطها وواجباتها ومفسداتها ، وأحكام الطهارة.وهكذا في كل حاجة واجبة عليكي
ونعرف حكم أي معاملة هتعمليها من جهة جوازها من عدمه، وإيه شروط صحتها، وإمتى تكون هذه المعاملة على خلاف الشرع؛ زي معرفة أحكام النكاح للي عايز يتزوج، وأحكام الشركة للي عايز يقيم شراكة مع حد، وهكذا .

ده الحد الأدنى اللي لازم نعرفه
زدتي عليه وتفقهتي في أمور دينك يبقى خير وبركة وربنا يجزيكي خير




واحدة تيجي تقولي يعني إنتي عايزانا كلنا نفضل نتعلم شرعي وخلاص

ماشي ياستي بسيطة هنروح دروس ونسمع شيوخ ونقرأ كتب دينية
واحنا كده نبقى براءة

أقولك لا ياجميل مش كده

إحنا كلنا لازم نعرف الحد الأدنى من العلوم الشرعية اللي قلت عليها
لكن لما كلنا نروح نتعمق في العلوم الدينية مين هيبقى طبيب ومين هيكون مهندس ومين هيكون مدرس ومين هيكون ميكانيكي ومين هيكون فلاح وغيره وغيره

يقول الله تعالى : " وما كان المؤمنون لينفروا كافة فلولا نفر من كل فرقة منهم طائفة ليتفقهوا في الدين ولينذروا قومهم إذا رجعوا إليهم لعلهم يحذرون "
لاحظتي قال طائفة يتفقهوا في الدين اللي همه علماء الدين
لكن الباقي بقى بعد ماعرف الحاجات الأساسية اللي كل واحد لازم يعرفها في دينه يروح يشوف العلوم التانية لأننا برضه بنحتاجها
ولو تعلم الاتنين مع بعض وتعمق فيهم يبقى خير وبركه وجزاه الله خيرا

يبقى دينا دين العلوم كلها مش العلم الشرعي بس



طيب انتي تعرفي إن تعلم العلوم دي فرض كفاية
يعني لو قصر المسلمون في طلب العلوم الدنيوية واحتاجوا لغيرهم يبقى يأثم الجميع ؟

ده اللي خلانا نرجع لورا بقى العلم بالنسبة لينا عبء كبير وهم وغم
لكن لو أخلصنا النية لله كان كل كلمة بتقريها هتكون في ميزان حسناتك
وسهرك بالليل كله يكون في سبيل الله .

تخيلي بقى كل الحسنات اللي بتاخديها وانتي رايحة المدرسة أو الجامعة والحسنات اللي بتاخديها وانتي بتذاكري وبتقري

ذاكري وانتي في بالك كل الحسنات دي
ذاكري وإنتي في بالك انك تكوني طبيبة علشان بنات المسلمين ميروحوش لطبيب يكشفوا عوراتهم قدامه
ذاكري وانتي في بالك تكوني معلمة تنشئي جيل صالح
ذاكري وانتي في بالك نهضة أمتك




لسه مش بتحبي المذاكرة ؟

عايزاكي من النهاردة تاكلي الكتب أكل
ومش بس توقفي عند الكتب الدراسية
لأه اقري واعرفي اكتر عن دينك مع مذاكرتك في مدرستك أوجامعتك

ولو شوفت حد منكم مش بيحب إنه يتعلم ويعرف أكتر بعد الكلام اللي قلناه معنيدش تفاهم خلاص


أشوفكم بكره بإذن الله

جزاك الله خيرا