ورقة وقلم بسرعة وتعالوا

بصي يا انسة لو سمحتي

يا حاجة ايوة اتفضلي معانا انتي و الحاج برضه

يا ريس يا ريت لو تشاركنا

و انت كمان عاوزينك ثواني معانا

السلام عليكم و رحمة الله و بركاته

الموضوع ببساطة كدة

عاوزين ورقة وقلم من كل اللي قلنالهم ييجوا هنا

انت و هو و هي و الحاج و الحاجة و الناس كلها اللي معانا

أو على الأقل ملف وورد أو نوت باد و خليك مركز

جبتهم خلاص ؟

طيب خليهم معاك بقى علشان احنا مش عاوزينهم لينا

احنا عاوزينهم ليك انت

استعد بقى

عاوزينكم تجاوبوا معانا على سؤال كدة عالماشي يعني

هو احنا بصراحة يعني كدة عملنا ايه في حياتنا ؟

هو انا ليه ؟

هو دة السؤال بس يا ترى أقصد بيه ايه ؟

هو انا ليه ؟ ايوة انا علشان ايه ؟ و أنا عملت ايه ؟

ببساطة كدة قال الله تعالى : " وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ (56) " الذاريات

ياريت نشوف تفسير الآية دي في كتب التفسير " هنتعبكم شوية معلهش "

و ببساطة انت مخلوق لسبب واحد بس هو عبادة ربنا وحده لا شريك له

و تعرف ايه عن العبادة ؟

تعريف العبادة: اسم جامع لكل ما يحبه الله و يرضاه من الأفعال الظاهرة و الباطنة

ايوة كدة كويس جدا

طيب هل أنا عملت اللي أنا مخلوق علشانه ؟

تخيل كدة ان واحد يوم القيامة و واقف يتحاسب و بعدين ملائكة العذاب أخذوه على النار يصرخ فيهم و يقولهم سيبوني أنا معملتش حاجة

تقوله ايه :؟

قوله ما هو فعلا علشان كدة

علشان انت معملتش حاجة كويسة

معملتش حسنات معملتش حساب للحساب دة

مبصيتش لمستقبلك في الآخرة

طيب و انت بقى هل مستعد تكون زي حالاته كدة ؟

و مستني اللحظة دي ؟

طيب اقولك حاجة تانية

تصور تاني : عارف قصة اصحاب الغار ؟

الثلاثة اللي اتقفل عليهم الغار

معلهش بس هنقول قصتهم علشان اللي مش عارفها

عن عبد الله بن عمر رضي الله عنهما عن النبي صلى الله عليه وسلم قال :

" بينما ثلاثة نفر يمشون أخذهم المطر فأووا إلى غار في جبل فانحطت على فم غارهم صخرة من الجبل فانطبقت عليهم فقال بعضهم لبعض انظروا أعمالا عملتموها صالحة لله فادعوا الله بها لعله يفرجها عنكم قال أحدهم اللهم إنه كان لي والدان شيخان كبيران ولي صبية صغار كنت أرعى عليهم فإذا رحت عليهم حلبت فبدأت بوالدي أسقيهما قبل بني وإني استأخرت ذات يوم فلم آت حتى أمسيت فوجدتهما ناما فحلبت كما كنت أحلب فقمت عند رءوسهما أكره أن أوقظهما وأكره أن أسقي الصبية والصبية يتضاغون عند قدمي حتى طلع الفجر فإن كنت تعلم أني فعلته ابتغاء وجهك فافرج لنا فرجة نرى منها السماء ففرج الله فرأوا السماء وقال الآخر اللهم إنها كانت لي بنت عم أحببتها كأشد ما يحب الرجال النساء فطلبت منها فأبت علي حتى أتيتها بمائة دينار فبغيت حتى جمعتها فلما وقعت بين رجليها قالت يا عبد الله اتق الله ولا تفتح الخاتم إلا بحقه فقمت فإن كنت تعلم أني فعلته ابتغاء وجهك فافرج عنا فرجة ففرج وقال الثالث اللهم إني استأجرت أجيرا بفرق أرز فلما قضى عمله قال أعطني حقي فعرضت عليه فرغب عنه!
فلم أزل أزرعه حتى جمعت منه بقرا وراعيها فجاءني فقال اتق الله فقلت اذهب إلى ذلك البقر ورعاتها فخذ فقال اتق الله ولا تستهزئ بي فقلت إني لا أستهزئ بك فخذ فأخذه فإن كنت تعلم أني فعلت ذلك ابتغاء وجهك فافرج ما بقي ففرج الله
وفي رواية فخرجوا يمشون " متفق عليه واللفظ للبخاري

كانوا ثلاثة و كل ما واحد يدعو بالعمل الصالح اللي عمله نفرج جزء من الصخرة لحد ما الثلاثة دعوا فانفرجت الصخرة تماما و خرجوا

الورقة و القلم لسة معاك صح ؟

اكتب بقى الأسئلة الجاية دي في الورقة يا ريس و جاوب عليها :

1 – لماذا خلقني الله ؟

2 – ماذا قدمت لدين الله ؟

3 – ماذا لو كنت الرابع " لو انت الرابع بتاع اصحاب الغار و خروجهم متوقف على انك تدعو الله بعمل صالح علشان تخرجوا " كنت هتلاقي موقف تدعو ربنا بيه ؟

افتراضا اجابتك وحشة النهاردة عن الأسئلة دي

يبقى لازم تتغير النهاردة

و هتجيب ورقة و قلم بكرة و تسأل نفسك نفس الأسئلة

لأنك متعرفش هتتعرض لموقف اصحاب الغار امتى ؟ و متعرفش هتموت امتى ؟

انا ممكن أموت حالا و ممكن بعد دقيقة او اتنين او عشرة او ساعة او ساعتين

بس احنا ليه بنفترض دايما الافتراض ان الموت لسة بدري عليه ؟

كان أحد السلف يضع ورقة في جيبه و يقرأها ما بين الحين و الآخر و كان المكتوب فيها : " أحسن عملك فقد دنا أجلك "

هي دي الناس اللي عايشنها صح

ناس مستعدة للموت في أي لحظة

يبعث المرء على ما مات عليه

علشان كدة لازم الواحد فينا يكون كل همه يموت على عمل صالح و دة مش هيكون بالتسويف و اني اقول هابقى كويس لما اكبر او لما اتجوز او... او ...

متنسوش تكتبوا و تجاوبوا على الأسئلة

يتبع..........